هل تراجع الزمالك عن قرار الانسحاب من مواجهة الأهلي؟ "المتحدث الرسمي يجيب"

تحدث الإعلامي أحمد سالم، المتحدث الرسمي باسم نادي الزمالك، عن موقف مجلس الإدارة من خوض مباراة القمة أمام الأهلي والمقرر إقامتها يوم الثلاثاء المقبل.
قال "سالم" في مداخلة هاتفية مع برنامج "الكورة مع فايق" المذاع على شاشة mbc مصر 2 والذي يقدمه الإعلامي إبراهيم فايق: "القرار النهائي هو القرار الأول، مفيش أي تغيير أو تراجع، نفس موقفنا متمسكين بما ذكر في البيان مش هنلعب أي مباراة في الدور الثاني غير لما تستكمل مباريات الدور الأول بالكامل".
تابع: "عندنا مطالب محددة وشرعية ومفيهاش أي تجاوز أو تربص بحد، فيه قرعة اتعملت أول السنة وأنا ملتزم بيها، عايز هتتغير على أساس إيه وايه سر للترتيب الغريب للمباريات لبعض الأطراف، لو لقينا إجابات على الأسئلة دي، ساعتها ممكن يبقى فيه حوار".
أكد أن الأهلي ليس طرفا في الأزمة على الإطلاق، الصدفة الوحيدة الغير متعمدة إن الأهلي هو اللي مباراته يوم الثلاثاء، كما أعلن عن تقديم شكوى ضد اللواء ثروت سويلم لأن ما بدر منه من تصريحات كانت مسيئة لنادي الزمالك.
ورد على سؤال ماذا سيكون موقف الزمالك في حال أن رابطة الأندية لم تستجيب لمطالب النادي التي ذكرت في البيان، قال: "مش هنلعب، المبادئ والمواقف الثابتة والوصول لأي حق، أكيد بيبقى فيه خسائر، مهما كانت الخسائر طول ما أنا مقتنع إن أنا صاحب حق ومحدش يمس كرامة وقيمة الزمالك، مستعدين نقدم أي تضحيات بدون ألم ولا مشكلة غير إن الزمالك ياخد حقه والمنظومة تنتظم".