حصلت «عرب بريس» على نص تحقيقات النيابة العامة في اتهام خفير بالتحرش بمريضة داخل مستشفى الهرم، وذلك بعدما أُحيل المتهم إلى المحاكمة عقب انتهاء التحقيقات، قبل أن تقضي المحكمة ببراءته، وفق ما ورد بشأن الحكم وأسبابه المتعلقة بظروف المتهم وسنه.
وتكشف التحقيقات تفاصيل الواقعة على لسان المجني عليها والمتهم، حيث روت السيدة، البالغة من العمر 63 عامًا، ملابسات اتهامها له بالتحرش بها أثناء انتظار دورها أمام عيادة الباطنة، فيما أنكر المتهم الاتهام، مؤكدًا أنه كان يبحث عن زوجته داخل المستشفى.


وإلى نص التحقيقات:
اسم المجني عليها: نادية، 63 سنة.
س: ما تفاصيل شكواكِ؟
ج: اللي حصل إني كنت في مستشفى الهرم في قسم العيادات الخارجية، وأنا واقفة قدام عيادة الباطنة عشان أكشف باطنة، عشان عندي الضغط، وواقفة في طابور الستات اللي قدام العيادة، ومفيش رجالة جمبنا، فالانتظار قدام العيادة كان كتير، رغم إني كنت أول واحدة والدور عليا إني أدخل. والنور قطع وإحنا واقفين، فاريحت على الباب مستنية. كان الدور عليا، فقلت أسند وأستنى، وأثناء ده كان النور قاطع والدنيا زحمت، فاللي ورايا كان مقبل عليا، قلت مش فارقة، الدنيا زحمة واللي واقفة ورايا ست أكيد، فمش مهم. فأنا ساندة على الباب لقيت اللي كانت واقفة ورايا بتقولي: هو الراجل اللي ورا ده تبعك؟ فروحت قلتلها: راجل، ولفيت شوفته، روحت مدياه بالقلم عشان كان قريب قوي، ده وش في وش، وبعدها طلع يجري، فأنا وقفت وخلاص افتكرته جري. وبعدها جه دوري، روحت داخلة أكشف، وبعد ما كشفت وخرجت لقيته برضه لازق في الستات، فأنا ما تمالكتش نفسي ساعتها، وروحت رايحة عنده وقلتله: أنت ما بتحرمش؟ روحت ضارباه بالقلم، وحاول يجري، فزعقت، والأمن جه ومسّكوه وخدوه على النقطة بتاعة المستشفى، وعملوا محضر وخدوا أقوالي.

س: متى وأين حدث ذلك؟
ج: الكلام ده حصل يوم الأحد 2026/9/6، حوالي الساعة 12:00 ظهرًا تقريبًا، في قسم العيادات الخاصة بالمستشفى.
س: ما سبب ومناسبة تواجدك بالمكان والزمان سالفي الذكر؟
ج: أنا كنت في مستشفى الهرم بكشف في عيادة الباطنة عشان أنا مريضة سكر.
س: من كان برفقتك آنذاك؟
ج: كنت لوحدي.
س: وما بادرة حدوث الواقعة محل التحقيق؟
ج: أنا كنت واقفة في الطابور اللي قصاد عيادة الباطنة في قسم العيادات الخارجية في مستشفى الهرم، والدور كان طويل، فتعبت، فجاء دوري أنا اللي هدخل، فأنا كنت قدام الباب، فوقفت ريحت على الباب شوية، والنور ساعتها كان قاطع، فالدنيا كانت زحمة، واللي ورايا كان لازق فيا وبيزق، فافتكرت إنه عادي، الدنيا زحمة واللي واقفة ورايا واحدة ست، فما ركزتش.
س: وما حالتك آنذاك؟
ج: أنا كنت واقفة في طابور عيادة الباطنة بتاع الستات ساعتها.
س: ومتى تحديدًا انقطع التيار الكهربائي؟
ج: النور قطع من أول ما وقفت في الطابور.
س: وما حالة الصف الذي كنتِ تقفين به؟
ج: حضرتك، أنا كنت واقفة أول واحدة في الطابور، وورايا ستات عادي برضه في الطابور، والدور كان عليا إني أدخل ساعتها، ومكنش في حد قصادي، واللي ورايا كان مريح عليا بجسمه.
س: وما مردودك على تزاحم الصف من خلفك؟
ج: قلت بصوت عالٍ: يا جماعة، مش كده.

س: وما وجهتك آنذاك؟
ج: قلتلهم وأنا باصة قدامي، بس عليت صوتي عشان يسمعوا، والدنيا زحمة.
س: هل تقفين على نوع جنس من كان خلفك بالصف آنذاك؟
ج: أيوة.
س: وما نوع جنس من كان خلفك آنذاك؟
ج: ست.
س: وكيف وقفتِ على ذلك؟
ج: عشان اللي ورايا كانت واحدة ست، والطابور طابور ستات.
س: صفّي لنا حالة الضوء والرؤية آنذاك عقب انقطاع التيار الكهربائي؟
ج: الرؤية مش زي النور، بس كان في ضي من الشمس من الشبابيك.
س: وما الذي قطع انتظارك آنذاك؟
ج: لقيت الست اللي كنت فاكراها ورايا بتقولي: هو الراجل اللي وراكي ده تبعك؟
س: وما مردودك على ذلك؟
ج: روحت قلتلها: راجل، ولفيت ورايا على طول أبص، لقيت راجل بيني وبينه مفيش سنتيمترات، كان وشه في وشي، فطبعًا اتصدمت، وروحت ضارباه بالقلم، وطلع يجري في لحظتها، فقلت تلاقيه جري بره المستشفى، وجه دوري ودخلت كشفت.
س: وما الذي أبصرتِه تحديدًا حال التفافك للخلف؟
ج: لقيت راجل بجلابية واقف ورايا ومريح عليا بجسمه.
س: هل تقفين على أوصاف المتهم؟
س: وكيف تقفين على ذلك؟
ج: عشان إحنا كنا وش لوش.
س: وما أوصاف المتهم تحديدًا؟
ج: هو راجل كده عجوز كده، وأصلع، ودقنه بيضاء، وقصير، وقمحاوي، ولابس جلابية فيراني.
س: هل انصرفتِ من المستشفى عقب إجراء الكشف سالف البيان؟
ج: لا.
س: وما الذي حال دون ذلك؟
ج: عشان أول ما خرجت من العيادة لقيته واقف في طابور ستات تانية، فروحت جريت عليه.
س: هل دار ثمة حديث فيما بينك وبينه آنذاك؟
ج: أيوة.
س: وما مضمون ذلك الحوار تحديدًا؟
ج: جريت قلتله: هو أنت إيه، ما بتحرمش برضه؟ مصر على اللي أنت بتعمله؟ ولسه بيحاول يعتذر، روحت ضربته بالقلم، وطلع يجري، روحت مصوّتة، والأمن مسكوه وودوه على النقطة.
س: صفي لنا الأفعال المادية التي أتاها المتهم آنذاك؟
ج: كان مريح عليا بجسمه كله وضاغط عليا.
س: هل استطالت يد المتهم إلى أي من مواطن عفتك؟
ج: لا، كان مريح عليا بجسمه بس.
س: وما المدة التي استغرقها فعل المتهم آنذاك؟
ج: دقايق، مش فاكرة كام بالظبط.
س: وما المسافة الفاصلة فيما بينك وبين المتهم آنذاك؟
ج: كانت مسافة قليلة أوي، لدرجة إني لما لفيت لقيته وش في وش.
س: أتم ذلك الفعل برضاء منك؟
ج: لأ طبعًا، مش برضايا.
س: وهل كان سيختلف مردودك آنذاك إذا كان الفعل صادرًا من أنثى وليس رجلًا؟
ج: أكيد كانت هتختلف.
س: ولماذا؟
ج: عشان مفيش راجل يبقى مريح جسمه كده على واحدة ست.
س: وما مردودك على ذلك آنذاك؟
س: هل تم ضبطه آنذاك؟
ج: روحت لفيت بصيت له، لقيته مريح عليا برضه، وروحت قلتله: بتعمل إيه؟ ومزعقة وضرباه بالقلم.
س: وما الذي حال دون ذلك؟
ج: عشان طلع يجري.
س: وهل تمت ملاحقته من قبل ثمة أشخاص؟
ج: لا.
س: وما الذي حال دون ذلك؟
ج: أنا عن نفسي افتكرته طلع يجري بره المستشفى.
س: هل صادف تقابلك مع المتهم مرة أخرى؟
ج: أيوة.
س: صفي لنا ظروف تقابلك معه للمرة الثانية؟
ج: أنا لما خرجت من العيادة لقيته واقف.
س: وما حالته آنذاك؟
ج: كان واقف ورا طابور ستات برضه.
س: وهل دار ثمة حوار فيما بينك وبينه آنذاك؟
ج: أيوة.
س: وما طبيعة ذلك الحوار؟
ج: جريت عليه وقلتله: هو أنت إيه، ما بتحرمش؟ ولسه بيحاول يعتذر، روحت ضربته بالقلم وطلع يجري.
س: هل قمتِ بالاستغاثة آنذاك؟
ج: أيوة.
س: وما نتيجة تلك الاستغاثة؟
ج: الأمن مسكوه وودوه على النقطة.
س: هل كان المتهم حاملًا لثمة أسلحة أو أدوات آنذاك؟
ج: لا.
س: وهل حسر المتهم عنك ملابسك آنذاك؟
ج: كان مريح عليا بجسمه كله.
س: هل تتضررين من ثمة أشخاص؟
ج: [العبارة غير واضحة في أصل التفريغ].
س: وممن تتضررين تحديدًا؟
ج: أنا بتضرر من عارف.ص.م.
س: وبماذا تتضررين من المتهم/ عارف؟
ج: بتهمه إنه اتحرش بيا وإنه لمس أجزاء مني.
س: ما قصد المتهم من ذلك؟
ج: قصده يتحرش بيا.
س: وكيف وقفتِ على ذلك؟
ج: عشان مفيش راجل بيبقى محمل على ست كده، وكمان لما ضربته جري ومدافعش عن نفسه خالص، ورجع تاني وقف في طابور ستات لما أنا خرجت من العيادة.
س: هل توجد ثمة علاقة أو خلافات فيما بينك وبين المتهم/ عارف؟
ج: لا، مفيش علاقة أو خلافات.
س: هل للمتهم اسم شهرة؟
ج: لا، معرفش.
س: هل للمتهم ثمة قضايا مماثلة أو غير مماثلة؟
ج: لا، معرفش.
س: هل لديك أقوال أخرى؟
ج: لا.
تمت أقوالها ووقّعت منها.
هذا، وقمنا بتنحية المجني عليها أمامنا خارج غرفة التحقيقات، وبمناسبة تواجد المتهم خارج غرفة التحقيقات فدعوناه بداخلها، وبمناظرته ألفيناه رجلًا في آخر العقد السادس من العمر، قصير الطول والقامة، أصلع الرأس، قمحي البشرة، ذو لحية بيضاء اللون وشارب من ذات اللون، يرتدي جلبابًا فضية اللون، وينتعل بقدميه زحافًا أسود اللون.
هذا، وبسؤاله عن التهمة المنسوبة إليه عقب إحاطته بها علمًا وبعقوبتها، وأن النيابة العامة هي التي تباشر معه التحقيق، أنكرها.
وبسؤاله عما إذا كان معه ثمة شهود نفي أو محامٍ يحضر معه التحقيقات، أجاب عن الشق الأول بالنفي، وعن الشق الثاني بحضور الأستاذ محاميه.
س: ما قولك فيما هو منسوب إليك من أنك متهم بهتك عرض المجني عليها/ نادية، بأن قمت بملامسة أماكن العفة الخاصة بها، وعلى النحو المبين بالتحقيقات؟
ج: محصلش، أنا كنت بدور على مراتي.
س: ما ظروف ضبطك وعرضك علينا إذًا؟
ج: كنت بدور على مراتي علشان كانت بتكشف مسالك بولية، ولم أعثر عليها، ولقيت الست دي بتتهمني بأنني تحرشت بها، وقلت لها: أنا مش بتاع كده، ولقيت شرطة المستشفى مسكوني، والنقطة بعد كده بعتت جابت قسم الطالبية وخدني على القسم، ومن القسم جيت على النيابة.
س: متى وأين حدث ذلك؟
ج: الكلام ده حصل امبارح 2026/9/6، على الساعة 11:30 الصبح تقريبًا، جوه مستشفى الهرم.
س: من كان برفقتك آنذاك؟
ج: كنت أنا لوحدي.
س: ما سبب ومناسبة تواجدك بالمكان سالف الذكر؟
ج: كنت رايح عشان مراتي كانت تعبانة وبتكشف مسالك بولية.
س: من قام بضبطك وكم كان عددهم؟
ج: حوالي ثلاثة من أمن المستشفى، وبعدها جت الحكومة خدوني على قسم الطالبية.
س: هل دار ثمة حوار فيما بينك وبين من قام بضبطك؟
ج: لا.
س: هل انصرف على شخصك ثمة تفتيش؟
ج: أيوة.
س: ما الذي أسفر عنه ذلك التفتيش؟
ج: ملقوش معايا حاجة.
س: هل توجد ثمة علاقة أو خلافات فيما بينك وبين المجني عليها/ نادية؟
ج: لا، مفيش علاقة ولا خلافات.
س: وما قولك فيما شهدت به سالفة الذكر بتحقيقات النيابة العامة المؤرخة 2026/9/7؟
تلوناها عليه تفصيلًا.
ج: لأ، الكلام ده.
س: وبماذا تعلل إذًا ما شهدت به سالفة الذكر؟
ج: معرفش بتتبلى عليا ليه.
س: وما حالة مستشفى الهرم بقسم العيادات الخاصة آنذاك؟
ج: كانت زحمة.
س: صف لنا كيفية بحثك عن زوجتك آنذاك؟
ج: كنت بمشي على باب العيادات أشوفها واقفة فين، وروحت سألت عند شباك التذاكر وقلت: في عندك اسم نادية خميس سيد عندك؟ قالي لا.
س: هل تصادف واصطدمت بثمة أشخاص حال بحثك عن زوجتك آنذاك؟
ج: لا.
س: هل لديك اسم شهرة؟
ج: لا، مليش.
س: هل تم اتهامك بثمة قضايا أخرى أو مماثلة من قبل؟
ج: لا.
س: أنت متهم بهتك عرض المجني عليها/ نادية، بأن قمت بملامسة أماكن العفة الخاصة بها؟
ج: محصلش، أنا كنت بدور على مراتي.
س: هل لديك أقوال أخرى؟
ج: لأ.
تمت أقواله ووقّع منه بذلك.
وكيل النيابة العام
طلب الحاضر مع المتهم إخلاء سبيله لانتفاء مبررات الحبس الاحتياطي، لوجود محل إقامة ثابت ومعلوم له، ولا يُخشى من هربه أو عبثه بأدلة الاتهام، كما دفع موضوعيًا ببطلان إجراءَي الضبط والقبض، وذلك لعدم توافر أي حالة من حالات التلبس، ودفع بانعدام الدليل وعدم توافر ركنَي الجريمة المادي والمعنوي، ودفع بعدم معقولية الواقعة واستحالة تصورها وكيدية الاتهام وتلفيقه، كما التمس اتخاذ اللازم نحو تفريغ كاميرات المراقبة بمحل الواقعة المشار إليها بالأوراق، وذلك من الساعة الحادية عشرة صباحًا وحتى الساعة الرابعة مساءً بتاريخ 2026/9/6.
- "أنا اللي رميتها في الميه بإيديا"، تفاصيل جديدة عن اعتراف والد طفلة المنوفية (فيديو)
- ياسمين أحمد كامل من مهرجان القاهرة: جذور اختيارات الإنسان تبدأ من الطفولة
- جهاد حسام الدين: درست في مدرسة فرنسية وما حصليش انصهار كامل بها (فيديو)
- أحمد داش: "كنت محظوظ لعملي مع مخرجين فاهمين الشباب" (فيديو)
- عاملة مصنع بعد لقاء رئيس الوزراء: كنت فخورة واللقاء أكبر داعم للاستمرار بالنجاح






