ساخرون.. غراب البين يكتب: سيبوا الهرم في حاله

بعد يوم طويل من اللف والدوران والمرازية فى خلق الله.. قررت أريح جتتى ساعتين.. جلست فوق جزع الشجرة وانكمشت بين جناحىَّ.. وقبل أن تروح عيناى فى النوم سمعت صوتا يأتى من المقهى أسفل الشجرة لشاب يقول: هو احنا لاقيين ناكل لما عايزين يبطنوا هرم منكورع؟! فيرد عليه آخر قائلا: هيبلطوه مش هيبطنوه.. افهم بقا! 

ثالثهم حسم الأمر قائلا: والله ما حد فاهم حاجة.. هما مين دول اللى هيبطنوه أو هيبلطوه.. واشمعنى دلوقتى.. هو منكورع اشتكالهم من البرد مثلا فعايزين يدفوه؟! 

طبعا الهرى ابتدى والكلام بقى رايح جاى وكل واحد فيهم بيكرر الكلمتين اللى بيقراهم عَ الفيس أو تويتر وبيسمعهم فى البرامج الليلة، وأيقنت أن الليلة دى مافيهاش نوم أصلا.. وقفت على قدمى ونفشت ريشى وأخذت أنعق بأعلى صوتى “قاق قاق”.. فراح زبائن المقهى يهشوننى ويقولون لى: غور من هنا يا غراب البين جبتلنا النكد والفقر.. 

فهربت مسرعا ولسان حالى يقول: بقا أنا اللى جبتلكم النكد والفقر يا شوية بنى آدمين أم أنكم من تنكدون على أنفسكم ليل نهار بأفعالكم وتصرفاتكم الخارجة عن حدود العقل يعنى إيه ناس عايزة تبطن الهرم أو تبلطه فى هذه الظروف اللى بتمر بيها بلدهم.. 

ومين المسئول عن القرارات دى وإزاى سايبين الناس تضرب أخماس فى أسداس ومحدش فاهم حاجة لدرجة أن حالهم بقى يصعب على الغربان أمثالى. أرجوكم سيبوا الهرم فى حاله.. أما صحيح شوية بنى آدمين ملهمش غير فى اللت والعجن والضجيج بلا طحن!