مجلس النواب يعقد جلسة غدًا وفقًا لطلب رئيس الجمهورية

قرر مجلس النواب برئاسة المستشار هشام بدوي عقد جلسة عامة غدا الساعة الواحدة ظهر 18  أكتـوبر 2026، في ضوء طلب السيد رئيس الجمهورية.

وقال مجلس النواب في بيان مقتضب، في ضوء طلب السيد رئيس الجمهورية، فقد تقرر عقد الجلسة العامة للمجلس الساعة الواحدة ظهر غدا الأحد 18 أكتـوبر 2026.

وقد تحدث الرئيس عبد الفتاح السيسي عن دور الأشقاء فى الخليج فى دعم الدولة المصرية عقب أحداث عام 2011 قائلا: "الأحداث بتاعت 2011، زي ما قلت كده: الدولة جت على الأرض، الدولة المصرية جت على الأرض، الاحتياطي خلص كله، والاقتصاد انكمش، ولا بقى في وقود، ولا في أي حاجة.. لمّا جت 2013 واتحركنا التحرك ده، أنا بقوله دلوقتي عشان تسمعوه وتسمعوه كويس، ومن فضلكم كل كلمة بقولهالكم، راجعوا اللي يفتكر الكلام ده، راجعوا كلامي كويس: إنتوا عارفين لو ماكانش في 2013 الأشقاء في الخليج، وقفوا جنب مصر.. هقول إيه اللي حصل: سفن البترول، والغاز، والبوتاجاز، والقمح، كانت بتيجي من غير حساب! بتيجي من غير حساب! طب لو ما كانش حد عمل كده، أنا مش عارف كانت الدولة المصرية هتعمل إيه؟!.. أنا بكلمكم: عشان ده ميتكررش تاني.. عشان نعترف بالجميل.. عشان نعرف إن النجاح ما كانش إن إحنا... مش أنا، لا، ده ربنا سبحانه وتعالى حماكم. وأنا لن أستحي ولن أتحرج إن أنا أقدم الشكر والتقدير لأشقائنا في الخليج؛ المملكة العربية السعودية، دولة الإمارات، الكويت.

وأضاف الرئيس السيسي، خلال كلمته فى الأكاديمية العسكرية المصرية: "اسمحوا لي إن أنا أطلب من القوات المسلحة، في اليوم اللي احنا موجودين فيه ده، إن إحنا نقدم تحية عسكرية لهم. العميد محمد، من فضلك.. التحية العسكرية لأشقائنا في الخليج، من فضلك. (نداء قائد طابور العرض العسكري بأداء التحية العسكرية بالسلام والسلاح لجميع القوات والحضور).

وتابع الرئيس السيسي: "أنا بقول للمصريين عشان الناس اللي بتتكلم على مواقع التواصل وتنسى، وساعات تسيء وتتكلم كلام ما يليقش أبدًا: ما تنسوش! ما تنسوش أبدًا الكلام اللي أنا بقوله.. لأن ده لو ما كانش حدث في الوقت دوت، أنا بقولكم: أنا مكنتش عارف الدولة دي كانت هتعيش تاني إزاي؟ هتجيب منين يعني؟! هتجيب منين؟! كل واحد هيبقى في بيته عايز يفطر ويتغدى ويعيش يعني، عايز يركب عربيته ويلاقي الوقود بتاعها.. طب كنا هنجيب منين وما فيش فلوس؟.. الاحتياطي كله خلص في السنة ونص دول، خلص كله، والسياحة وقفت، وما بقاش في موارد.. وحتى القوات المسلحة بالمبلغ اللي أنا اتكلمت عليه ده.. ده كان بعد ما تم تسليم السلطة للرئيس مرسي الله يرحمه، فـ طلب 2 مليار دولار عشان يجيب وقود للدولة، كان اللواء محمود نصر الله يرحمه، والمشير طنطاوي، والفريق سامي عنان، ادوله 2 مليار. يومين تلاتة وقال: هاتوا 2 كمان، أكننا احنا بنطبع الفلوس يعني!.. فما كانش فيه خلاص، مكنش فيه.. فـ أنا بقول الكلام ده دلوقتي لأن لن ننسى أبدًا، أبدًا، لأشقائنا في الخليج ده. وأنا يمكن قلت كلام في أكاديمية الشرطة على إن احنا نقف بقوة ودعم كامل من أجل حماية أراضي أشقائنا في الخليج والدفاع عنها؛ نقف بقوة.

وقال الرئيس السيسي: أنا بس عايز أقول للدنيا كلها: إحنا مبندورش على دور نعمله، لكن مش معقول أبدًا إن إحنا نسمح إن المملكة العربية السعودية يعني يتم المساس بيها أو بأمنها أو باستقرارها.. وأنا بقول وبوجّه رسالتي للجميع في الخليج لإيقاف الحرب اللي موجودة.. ولكن بغض النظر عن النداء ده أو الأمل اللي أنا بتمناه من الله سبحانه وتعالى لإطفاء نار الاقتتال ده – هيحصل أو ما يحصلش –: مصر، طبقًا لتوجيهات جلالة الملك سلمان، وتوجيهات ولي العهد محمد بن سلمان، هننفّذ أي إجراء لحمايتكم والدفاع عنكم، لحمايتكم أو الدفاع عنكم..
وأنا عارف إن الموضوع ده بيتطلب من البرلمان المصري تصديق، وأرجو إن هما ينعقد البرلمان في جلسة طارئة حتى يعطينا هذا التفويض إذا طُلب منّا ذلك يعني. أنا بتكلم مش عشان نحارب حد أو نهاجم حد، إحنا بنتكلم للدفاع فقط".

وأكمل الرئيس السيسي فى نهاية كلمته: "أطلت عليكم، الموضوعين اللي أنا اتكلمت فيهم دول أنا بتصور إن هما موضوعين كنت محتاج إني أوجه كلامي لكم بشكل مباشر، وأطلب دعمكم فيهم الاتنين: الأولاني: من فضلكم ساعدوني على إن أنا أجهّز كوادر تقود الدولة، مش دلوقتي بس، ومش الـ 10 سنين اللي جايين بس، ده هنفضل نعمل الإجراء ده على طول؛ هنعتمد على شبابنا والخريجين المتعلمين تعليم جيد في كل التخصصات في درجات الماجستير والدكتوراه من مصر أو من خارج مصر، ونقعد نكمل هنا معاهم نعرّفهم يعني إيه دولة؛ لأن في كتير من الناس ما تعرفش يعني إيه دولة، وإن كل إجراء بيتعمل عشان رغيف العيش ييجي مصر ده قصة كبيرة أوي بتقوم بيها وزارات وهيئات وجهات، لمّا تتعثر المنظومة ديت الناس متلاقيش حاجة تاكلها.

واختتم الرئيس السيسي قائلا: "طوّلت عليكم، كل سنة وانتوا طيبين بمناسبة العيد الـ 53 لأكتوبر، ومش هنسى أبدًا إن أنا أوجّه التحية لكل القادة اللي أنا شفت... اللي موجودين في المنصة، من أول سيادة الفريق مجدي حتاتة، أهلاً وسهلاً بيك، وكل القادة من غير ما أذكر أسمائكم، أهلاً وسهلاً بيكم وشرفتونا".